YANZU-YANZU: Jarumin Yaki Da ’Yan Ta’adda Shehu Aljan Magajin Ali Kwara Ya Faɗa Tarkon Shari’a In Da Ta Daure Shi Tsawon Shekara 45
A daidai lokacin da miliyoyin al’ummar Arewacin Najeriya ke fuskantar matsanancin matsalolin tsaro, tashin hankali da hare-haren ’yan bindiga, wani jarumi da ya yi fice wajen kamawa da hana ayyukan ’yan ta’adda, Shehu Musa Aljan, na tsare da ɗaurin shekaru 45 a gidan yarin Abuja, a cewar wata ƙungiya mai fafutukar tabbatar da adalci.
Wasu matasa da ke bayyana kansu a matsayin masu rajin adalci sun bayyana ƙorafinsu kan yadda Shehu Aljan ya tsinci kansa a cikin mawuyacin hali, bayan ya kama wasu mutane da ake zargi da aikata ta’addanci a dajin da ke tsakanin Bauchi da Plateau.
A cewar bayanan da aka tattaro, Aljan ya samu nasarar kama mutane sama da 40 da ake zargin ’yan bindiga ne, waɗanda ke ɗauke da makamai da kuma shanun da ake zargin sun fito ne daga satar mutane. Haka zalika, rahotanni sun nuna cewa cikin mutanen da ya kama, akwai mutane 18 da ake zargin ba ’yan Najeriya ba ne.
Rahotanni sun kuma bayyana cewa, bayan kame su, wani jami’in ’yan sanda mai suna Damina ya ziyarci Aljan da abin da ake zargin kuɗi masu yawa, yana roƙon a saki mutanen. Sai dai an ce Aljan ya ƙi karɓar kuɗin tare da miƙa mutanen ga DPO na Toro da kuma sashen Anti-Kidnapping ƙarƙashin jagorancin CSP Yusuf Makama.
Lamarin ya ɗauki sabon salo ne bayan wani soja mai suna Major Babura, wanda yanzu ke aiki a Ofishin Mai Ba Shugaban Ƙasa Shawara kan Harkokin Tsaro (NSA), Malam Nuhu Ribado, ya kira Aljan yana sanar da shi cewa Gwamnan Jihar Bauchi, Bala Mohammed, na son ganinsa a gidan gwamnati.
Sai dai rahotanni sun nuna cewa a maimakon kai shi gidan gwamnati, an kai shi Sha-da-Wanka Army Barracks, inda ya kwana kafin daga bisani a mika shi ga hukumar DSS washegari, kamar yadda ƙungiyar ta bayyana bayan tattaunawa da Nura Aljan.
A cewar bayanan da ke yawo, Aljan ya bayyana cewa an rufe masa ido kafin a shigar da shi wani wuri, inda daga bisani ya tarar da Shugaban Miyetti Allah, Bello Bodejo, da kuma Sanatan Bauchi ta Kudu, Shehu Buba, a zaune a cikin wani ofishi.
Daga nan ne aka fara yi masa tambayoyi kan zargin cewa yana haɗin kai da ’yan bindiga, zargi da ya musanta ƙwarai, inda ya jaddada cewa shi ne ya kama su tare da miƙa su ga hukumomin tsaro.
Daga cikin mutanen da Aljan ya kama, an ce akwai wani fitacce da ake kira Kacalla Shagari, wanda ake zargin yana da hannu a sace ’yar uwar marigayi tsohon sanata Yahaya Gumau, tare da haɗin kai da Dogo Gide da sauran manyan ’yan bindiga.
Ƙungiyar ta bakin shugabanta, Comrade Yahaya M. Abdullahi, ta yi kira da babbar murya ga shugabannin hukumomin tsaro da Mai Ba Shugaban Ƙasa Shawara kan Tsaro, Malam Nuhu Ribado, da su sake duba shari’ar Shehu Musa Aljan, tare da yin adalci ta hanyar sakin sa bisa zaluncin da yake fuskanta.
